कोण सकाळी पूर्व दिशेला स्वरांजली वाहिते गाऊनी भीम-बुद्धाची गीते
कोण सकाळी पूर्व दिशेला
स्वरांजली वाहिते (२)
गाऊनी भीम-बुद्धाची गीते ।।धृ।।
कोण बरे शीलवंत ही देवी
गाई भीमाची मंजुळ ओवी
कोण माऊली भल्या पहाटे
अंगणी जल शिंपीते…
गाऊनी भीम-बुद्धाची गीते ।।१।।
पवित्र जलाने स्नान संपुनी
मिश्र फुलांचे हार गुंफुनी
कोण सुहासिन सौभाग्याचा
गंध-टिळा लाविते
गाऊनी भीम-बुद्धाची गीते ।।२।।
कुणी हे मंगल मंत्र बोलले
बुद्धं सरणं वदत चालले
कोण विनयशील अमुची भगिनी
धम्मपदा वंदिते
गाऊनी भीम-बुद्धाची गीते ।।३।।
जागे करुनी ह्या जनवृन्दा
पहा निरखूनि काशीनंदा
कोण पुजारीन ह्या शुभसमयी
बुद्धपुजा बांधिते
गाऊनी भीम-बुद्धाची गीते ।।४।।
कोण सकाळी पूर्व दिशेला
स्वरांजली वाहिते
गाऊनी भीम-बुद्धाची गीते